ఇళయరాజా ప్రారంభ జీవితం మరియు కష్టాల ప్రయాణం
ప్రముఖ సంగీత దర్శకుడు ఇళయరాజా ప్రస్తుతం రాజ్యసభ సభ్యుడిగా బాధ్యతలు నిర్వహిస్తూ ఆర్థికంగా ఉన్నత స్థితిలో ఉన్నారు. అయితే ఆయన సంగీత ప్రయాణం వెనుక ఎంతో కఠినమైన గతం ఉంది.
కడు పేదరికం నుంచి వచ్చిన ఆయన, గతంలో భుజాన హార్మోనియం పెట్టె వేసుకుని గ్రామాల్లో పాటలు పాడుకుంటూ జీవనం సాగించారు. ఆ తర్వాత చైన్నెకి చేరుకున్నాక కూడా కడుపు నింపుకోవడానికి తీవ్ర ఇబ్బందులు పడ్డారు.
దుకాణాల ముందు నిలబడి అడుక్కునేవాళ్లం : ఇళయరాజా
తాము చైన్నెకి వచ్చిన తొలినాళ్లలో ఎదుర్కొన్న ఇబ్బందికర పరిస్థితులను ఇళయరాజా స్వయంగా ఒక వీడియో ద్వారా పంచుకున్నారు. 1958 ప్రాంతంలో నవరాత్రి ఉత్సవాల సమయంలో తిండికి కూడా కష్టాలు ఎదురయ్యాయని తెలిపారు.
ఆ కాలంలో తన సోదరుడు భాస్కర్‌, దర్శకుడు భారతీరాజాతో కలిసి వరుసగా మూడు రాత్రులు పస్తులు ఉన్నట్లు ఆయన గుర్తుచేసుకున్నారు. ఆ సమయంలో వడపళనిలోని స్థానిక ఆలయం ఎదుట దుకాణాల్లో పూజలు చేసి అటుకులు, మరమరాలు, పప్పు బెల్లాలు పంచేవారన్నారు. తాము ముగ్గురం ప్రతి దుకాణం ముందు వరుసలో నిలబడి వాటిని సేకరించి, గదిలో ఒక కాగితంపై వేసుకుని తింటూ రోజులు గడిపినట్లు తెలిపారు.
భవిష్యత్తులో దాతృత్వ కార్యక్రమాలు
తన గతాన్ని గుర్తుచేసుకుంటూ, తాను పడిన ఇబ్బందులను భార్యకు వివరించినట్లు ఆయన చెప్పారు. ఆ తర్వాత ఆమె నవరాత్రి సమయాల్లో ఇతరులకు పులిహోర, పెరుగు అన్నం పొట్లు పంచుతూ వచ్చారని తెలిపారు. అలాగే, తదనంతరం సంగీత కచ్చేరీలు నిర్వహించినప్పుడు కళాకారులకు భోజనాలు పెట్టడాన్ని ఒక ఆనవాయితీగా మార్చుకున్నామని పేర్కొన్నారు.
ఈ విషయాలను ఎవరికీ ప్రచారం చేసుకోవడానికి కాదని, నవరాత్రి ఉత్సవాల సమయంలో ఎవరూ ఆకలితో పస్తులు ఉండకూడదనే ఉద్దేశంతోనే అలా చేసేవారమని ఇళయరాజా స్పష్టం చేశారు.
